Natalgeden ti kasasaad ti maysa a barangay tanod nga aksidente a nakapaltog iti dakulapna iti Barangay Road idiay Anonang Menor, Caoayan.
Ti tanod ket agtawen iti tallopulo ket uppat nga agnaed iti nasao a lugar.
Iti pannaki-uman ti Bombo Radyo Vigan ken ni ni PCpt. Lyka Bayasbas iti Caoayan Municipal Police Station, bayat ti panagawid ti tanod iti oras iti ala una kinse itay parbangon ket napansinna iti maysa a nangisit a pouch iti igid iti kalsada isu a kinitana ket naduktalanna iti maysa a paltog ngem saanna a masigurado no pudno wenno saan.
Segun ken ni Bayasbas, intawag ti tanod iti kapitanda iti napidotna ket impakaammona iti kalikagumna a panangiturn-over kenkuana.
Ngem gapu iti curiosity ket kinitana ngem aksidente a nagputok a gappuanan iti pannakatama iti akin-kannigid a dakulapna.
No pay kasta ket naisuko ti Barangay Tanod ti paltog iti kapitanda a nabigbig a homemade cal. 22 revolver nga adda kargana a dua a live ammunition sakbay a napan iti Ilocos Sur Provincial Hospital – Gabriela Silang para iti pannakatamingna.
Naiturn-over metten ti paltog iti Caoayan Municipal Police Station para iti proper disposition ken documentation.
