Naragsak ken proud ita ti maysa a Bigueño a nakoronaan kas first-ever Mr. Ilocos Sur 2025 iti kalkalpas a selebrasyon ti Ilocos Sur Festival.
Iti pannaki-uman ti Bombo Radyo Vigan ken ni Gabriel Faypon manipud Barangay Pantay Daya, saanna pulos a ninamnama nga isu ti makagun-od iti titulo ta adu dagiti nalaing a kalabanna ngem inaramidna ti amin a kabaelanna.
Idi damo ti pageant, kunana a nakarikna iti nerbyos ngem pinanunotna laeng a maenjoyna ti kompetisyon.
Pinagyamananna met dagiti tattao iti likudan ti daytoy a balligina nangruna iti trainor-na, pamilia, gagayyem ken dagiti payen kalugaranna a nangsuporta kenkuana.
Balakadna kadagiti adda met arapaapna a sumali iti pageant nga agbalin a napudno iti bagi ken agbalin a napakumbaba.
Daytoy ti maikatlo a gundaway pay laeng ni Faypon a sumali iti pageant ta iti damo ket ti Mr. and Ms. UNP idinto a ti maikadua ket ti Mr. Vigan.
