Parikut iti ayat ti mapapati a nagbekkelan ti maysa a lalaki idiay Barangay Solotsolot, San Juan, Ilocos Sur.
Iti pannaki-uman ti Bombo Radyo Vigan ken ni PLT. Reynal Ramos, Officer in Charge ti San Juan Police Station, nagpangta ti biktima nga agpakamatay iti nobiana ken nagisend pay iti ladawan ti nakabitin a tali kas makita iti conversation-da iti messenger.
Innayon ni Ramos a saan met a nadakdakamat ti biktima kadagiti nagannakna no ania ti parikutna.
Maipalagip a nadlaw ti ina ti biktima a busy ti anakna iti cellphone na iti alas onse kwarenta y singko iti rabii isu a binagaannan a maturog.
Idi mapan kinita ti ina ti biktima iti kuartona ta bagaanna koma nga ikapkapsut ti volume ti music na ket natakuatanna a nakabitin daytoy babaen iti tali a naiputipot iti tengngedna.
Nupay kasta, binalakadan ni Ramos dagiti nagannak nga ikkanda importansya ti marikrikna dagiti annakda ken kanayonda a bagbagaan.
