VIGAN CITY – Napatganen ti nabayag nga yar-arungaing dagiti taga-Sitio Gurgurung, Barangay Gusing, Sta. Maria a pagalaanda iti danum babaen ti flagship program ti Police Regional Office a 5Ps wenno ti Patubig ng Pulis, Pantawag ng Pulis, Pailaw ng Pulis, Pabahay ng Pulis ken Palikuran ni Juana nga idaulwan ni PBGEN. Westrimundo Obinque, Regional Director.
Dayta ket babaen ti naisayangkat a Turn Over Ceremony iti Patubig ng Pulis nga indaulwan ti Sta. Maria Police Station, iti liderato ni PCapt. Joel Dasargo a Chief of Police.
Segun ken ni Dasargo, awan ti sabali a kitkitaenda no di ket ti pagkasapulan dagiti agindeg isu a sipud adda ti ELCAC program a mangponpondo iti kapulisan iti duapulo a ribo a pisos, nagbalin a posible ti ganuatda a maipaay ti kiddaw dagiti agindeg.
Awan ti ubbog wenno gripo a pangalaan iti danum dagiti agindeg nangruna no tiempo ti kalgaw ta numan pay adda ti deposito ket saanda a maus-usar sipud naaramid gapuen ta awan ti host a mangsilpo iti pagalaanda iti tuktok ti bantay isu a maganar itan dagiti agindeg iti proyektoda a nabayag a saan a naus-usar.
Duapulo ket innem agingga tallopulo a household ti mabenepisyaran iti proyekto ngem no kabaelanton ti deposito ket mabalin nga ad-adunto payen.
