VIGAN CITY – Mapukpukaw ni Shery Mae Annayon Ramirez, agtawen iti duapulo ket siam, balasang nga agnaed idiay Barangay Bagani Gabor, Candon City.
Segun ti Candon City Police Station, pinasingkedan ni Potentiana Ramirez nga ina ti mapukpukaw a pimmanaw isuna iti pagtaenganda idi October 18 iti alas tres agingga alas kuatro iti malem ta immatendar iti bible study iti simbaan bayat a mamaturog ti anakna iti kuartona.
Kinuna ni Potentiana nga idi simmangpet iti alas sais iti malem, napansinna nga awan ti anakna ket uray ti bado nga inaramatna idi pinanawanna ket naipan iti pagmurengan isu a patienna a nagsukat ti anakna sakbay a pimmanaw iti pagtaenganda.
Impadasna a sapulen ti anakna kaduana dagiti gagayyem ken kabagyanna ngem agingga ita ket saanda pay a nasarakan a gappuanan ti panagreportdan kadagiti otoridad.
Kadagiti makakita ket kinuna ti Candon City Police Station a kontaken laeng ida babaen ti numero 09153618181.
