VIGAN CITY – Naireferen iti piskalya ti kaso a Qualified Theft a sangwen ni Marilou Garriga, agtawen iti innem a pulo ket dua, taga-Barangay Bantugo, Nagbukel a nagtakaw iti kuarta ken alahas iti pagtaengan ti kasinsinna a ni Melba delos Santos, agtawen iti innem a pulo ket uppat, agnaed iti nasao met laeng a lugar.
Iti pannaki-uman ti Bombo Radyo Vigan ken ni Police Captain Floro Cosning Jr., namitlo a daras a nagtakaw ti suspek – namindua iti November 2023 ken naudi idi Enero 4 ita a tawen.
Ti suspek ket innala a katulong ti biktima a mangaywan iti bedridden a kabsatna.
Innayon ni Cosning a talaga nga agkasapulan ti suspek ta masaksakit ket dagiti kuarta a natakawna ket impapautangna.
Nupay kasta, napagsasaritaan ti insidente iti barangay ket aminado met ti suspek iti inaramidna.
PHP238K ti kuarta nga in-inut a tinaktakaw ti suspek idinto a mapatta-patta a sangapulo ket dua a ribo a pisos met ti gatad dagiti singsing.
