Natay ti maysa a babai a napaltugan iti uneg ti pagtaenganna idiay Sitio Pitao, Barangay Bagalay, Tayum, Abra.
Ti biktima ket ni Florida Alcaide Teneza, agtawen iti tallopulo ket siam, taga-Bagalay, Tayum, Abra.
Ti met suspek ket ni Bobby Briosos alyas “Bob”, kumankandidato a para Municipal Councilor ti Dolores, Abra iti salinong ti Asenso Party para iti National and Local Elections inton 2025 ken agnaed iti Barangay Mudiit, Dolores, Abra.
Alas dyes y media iti rabii iti October 27, nakaawat ti tawag ti MTOC ti Tayum Municipal Police Station manipud iti Barangay Tanod ti Bagalay a ni Isidro Taeza a nangipakaammo nga adda napasamak a pammaltog iti nasao a lugar.
Maibasar iti imbestigasyon, adda iti uneg ti pagtaenganna ti biktima idi pinaltugan ti suspek a puon ti nakatayanna.
Dagus a naglibas ti suspek kalpasan ti pammaltog idinto a ti Tayum MPS ket nangisayangkat iti manhunt operation para iti pannakakemmegna.
Iti agdama, dukduktalen ti Tayum Police Station no ania ti posible a motibo ti pammaltog.
