VIGAN CITY – Maysa a street level individual ti nakemmeg ken naalaan iti maysa a gramo ti shabu babaen iti naiwayat a buy bust operation idiay Sta. Lucia.
Nabigbig ti suspek a Ms M., agtawen iti tallopulo ket innem, agnaed iti Sta. Lucia.
Iti pannaki-uman ti Bombo Radyo Vigan ken ni Police Major Roger Baling-oay, drug listed ti nasao a suspek ken namonitorda nga agtultuloy ti panagilaklakona isu a nangisayangkatda iti operasyon ket balligi met a nakemmeg.
Immunan a natiliw ti partnerna idi kallabes ket isunan ti nangitultuloy daytoy nga iligal nga aramidda.
Iti agdama, agtultuloy ti panangduktal dagiti pannakabagi ti linteg kadagiti sources ti suspek a daytoy ket maibilbilang a kadakkelan a supplier iti ili ti Sta. Lucia.
Kabayatanna, naala kenkuana ti maysa a gramo ti shabu nga aggatad iti PHP6,800 a naipalaon iti tallo a piraso a heat sealed transparent sachet ken maysa a piraso ti heat-sealed transparent plastic sachet a naglaon iti mapapati a shabu a dagitoy ket nagserbi kas buy bust item ken ikot ti suspek.
Malaksid dayta, karaman pay kadagiti naala nga ebidensya ti maysa a sangaribo a pisos a buy bust money, motorsiklo, cellphone ken tulbek ti motorsiklo.
Nupay kasta, sangwen ti suspek ti kaso a panaglabsing iti RA 9165 wenno Comprehensive Dangerous Drugs Act of 2002.
