VIGAN CITY – Awan ti makitkita a foul play dagiti pannakabagi ti linteg iti pannakatay ni Shierly Lescadan Mañez, agtawen iti limapulo ket maysa, mannalon, agnaed iti Barangay Sarmingan, Narvacan a mapapati a nagbekkel.
Iti pannaki-uman ti Bombo Radyo Vigan ken ni PMaj. Alexander Dangli iti Narvacan Municipal Police Station, single mother ti biktima ket mapapati a pagparparikutanna ti awan a suporta a maipaayna iti agkidkiddaw nga anakna nga agbasbasa idiay Baguio City.
Agmaymaysa ti biktima iti pagtaenganda ngem adda met latta dagiti mangpadpadas a mangkapatang kenkuana ngem saan a makaun-uni.
Segun iti kasinsin ti biktima a ni Joe-Ann Roman Medoza, agtawen iti uppat a pulo ket lima, napan isuna iti balay ti biktima tapno palagipan nga iddepenna ti radyona ta rabiin idin ta nasarakannan a nakabitin iti uneg ti pagtaenganna kangrunaan itis ala babaen ti tali a naiputipot iti tengngedna.
Naipaagas ti biktima iti Ilocos Sur District Hospital Narvacan ngem naideklarar a dead-on arrival.
Iti agdama, agtultuloy ti panagimbestigar dagiti pannakabagi ti linteg iti rason no apay a nagpakamatay ti biktima.
