VIGAN CITY – Nagpakamatay babaen ti panagbekkelna ni Emiliana Valera, agtawen iti limapulo ket pito, taga-San Julian West, Bantay.
Segun ken ni Cristina Valera, agtawen iti walopulo ket puto, ina ti biktima, alas otso y media iti rabii ti October 1 idi pimmanaw ti biktima iti sar-sari store-na a napan iti kuartona ngem idi linukatanna ti ridaw ti kuarto tapno riingen ti biktima, nasarakannan a nakabitin iti steel window ti kuartona babaen ti kurtina.
Gapu dayta, nagpatulong ti ina ti biktima iti anakna a ni Sonny tapno ibaba ti biktima ken naitaray iti ospital ngem naideklarar a dead on arrival.
Agsagsagaba iti stress ken depresyon ti biktima gapu ti online investment-na idi adda pay laeng idiay Singapore.
Immunan a nagkiddaw ti biktima iti pammakawan iti amin a pamilia ken kabagyanna kadagiti naglabas nga aldaw.
