VIGAN CITY – Mayorya kadagiti registered voters idiay Amerika ti mamati nga adda madi a naaramid ni dati a US-President Donald Trump.
Dayta ket basar iti kaudian a survey a naisayangkat tapno duktalen no ania ti reaksyon dagiti agindeg idiay Amerika iti indictment iti dati a presidente a maibilang a historical ta isuna laeng kadagiti dati a presidente ti na-indict.
Iti pannaki-uman ti Bombo Radyo Vigan ken ni Bombo International News Correspondent Leah Medado manipud iti estado ti Texas, patien ti kaaduan a voters nga adda pakabasulan ni Trump gapu iti mishandling kadagiti classified documents iti National Defense a dagitoy ket maysa kadagiti highly secured a dokumento.
Kalpasan ti indictment ti dati a presidentes, ad-adda pay a nagbalin nga agresibo dagiti Republicans a mangsuporta iti kandidaturana iti 2024 US presidential elections.
Kabayatanna, iti met bangir a partido, kayatda met a mabalud ni Trump gapu ti kinaadu dagiti kaso a sangsangwenna.
Nupay kasta, innayon ni Medado nga iti agdama ket qualified pay laeng ti dati a presidente nga ituloy ti kandidaturana nangruna ta adu dagiti mangsupsuporta kenkuana idiay Amerika.
