Nagpanawagan ti Mayors for Good Governance ken ni President Ferdinand Marcos Jr. nga inaganan dagiti korap a politiko ken contractor iti likod dagiti palpak a proyekto iti imprastraktura kangrunaan iti flood control.
Segun ti grupo a pakairamanan da Baguio Mayor Benjamin Magalong, Pasig Mayor Vico Sotto, Quezon City Mayor Joy Belmonte ken Isabela City Mayor Sitti Hataman, nabayagen nga adda korapsyon iti nasao a proyekto ken masapul a madusa dagiti adda pakainaiganna.
Kinunada nga apaman a mapanknekan a guilty-da ket masapul a maikkat a dagus iti opisina dagiti politiko ken bureaucrats a karaman ket maibaludda.
Kiniddawda iti Department of Public Works and Highways (DPWH) ken dadduma pay nga ahensya nga iruar dagiti dokumento ken inaganan dagiti politiko ken contractors a nairanud iti nasurok P100 billion a pondo a naipan laeng iti sangapulo ket lima a contractors manipod 2022 agingga 2025.
Nagtaud ti panawagan iti panagdanag ni Pres. Ferdinand Marcos Jr. iti kalidad dagiti proyekto kas kadagiti nadadael a flood barrier idiay Calumpit, Bulacan a nangibagaanna a nadismaya.
