VIGAN CITY – Mapapati a napangtaan iti biag da San Vicente Mayor Jose Cajigal Tabanda III ken ti running candidate-na para Vice Mayor a ni Jonan Dy Tabanda idiay Brgy. Poblacion, San Vicente idi January 14.
Segun ti San Vicente Municipal Police Station, nagturong da mayor ken ken Tabanda idi kalman iti police station ket impakaammoda a bayat ti panagturongda iti San Vicente agingga Bantay babaen ti naglugananda a Toyota Land Cruiser a minaneho ni Troy Alcain Salom ket napansin ti driver nga adda maysa a motorsiklo a nagluganan ti dua a lalaki a nakasuot iti nangisit a long sleeves ken agar-aramat ti full face helmet a mapapati a mangsursurot kadakuada manipod Brgy. Bayubay Sur, San Vicente.
Maibasar ti inisyal nga imbestigasyon, idi met laeng December 2021 ket napansin ni Tabanda ti motorcycle riding in tandem a mangsursurot kadakuada.
Pinasingkedan pay ti mayor a nakaawat pay iti text message manipod ti saan pay a nabigbig a nangibaga nga”Alwadam lang Apo Mayor, malpas met ngata ti pinagarim ti San Vicenten ta nu adda gundawayko ket papatayenkay a dua ken ni Erning”.
Impakammo pay ti mayor nga adda met laeng idi 2021 a saanen a naipakaammo kadagiti otoridad a bayat ti panagbiahe na kaduana ni Ernesto Cajigal para iti naituding a social meeting ket binagaanna ti driver-na a paspasanna ti panangpataray ti luganda gapu iti mapapati nga adda mangsursurot kadakuada.
