VIGAN CITY- Ipakpakemmeg ti Regional Trial Court, First Judicial Region, Branch 24, Cabugao, babaen ken ni acting presiding judge Hon. Raphiel Alzate, da Mayor Josh Eduard Cobangbang ken dagiti sangapulo ket siyam a kakadua na a nakasoan iti serious illegal detention ken grave coercion.
Nagramot iti kaso ti mayor ken dagiti pada na nga akusado iti mapapati a pannakapupok ken pannakabully da Virginia Nicole Savellano-Ong, ti anak na nga agtawen iti uppat ken dagiti sumagmamano nga empleyado na, idi inbanag dagiti opisyal ken empleyado ti munisipyo, pakairamanan dagiti sumagmamano a barangay official iti closure order ti local a gobiyerno iti Cabugao Beach Resort a kukua iti local a gobyerno nga imanmanehar ni Ong.
Segun iti reklamo, adda dagiti nakabantay nga armado a lallaki kadagiti sumrekan ken rumwaran iti beach resort idi August 23, 2017 isu a saan a makaruwar da Ong ken dagiti kakadua na.
Idi January 15, kinanunungan ni Justice Undersecretary Deo Marco ti reklamo ni Ong ket naitalmeg ti mayor ken dagiti nangibanag ti closure order gapu ta ti inaramid da ket mapapati nga iligal ta awan iti bilin a naggapu iti nangatngato nga opisina wennu court order tapnu maipaserra iti beach resort.
Ti agdama, al-alaen ti Bombo Radyo Vigan iti reaksyon ken pagtakderan dagiti akusado ken dagiti nangipila iti reklamo.
