VIGAN CITY – Awan pay laeng iti reaksyon wennu komento ni Bangued, Abra Mayor Dominic Valera iti inyetnag ti Office of the Ombudsman a desisyon a guilty isuna iti kaso a grave misconduct ken conduct prejudicial to the best interest of service isu a naimandar iti pannakaikkat na iti puwesto.
Gapu ti bilin a maikkat isuna iti puwesto, saan ton a pulo a makapagtugaw ni Valera iti aniyaman a public office, kasta pay a maibabawi ti eligibility na, pati dagiti retirement benefits na ken saanen a maipalubos a dumalan iti civil service examination.
Nagramot iti kaso ti mayor iti reklamo nga inpalubos ken indaulwan na iti transaksyon iti munisipyo kadagiti kompanya a kukua ti pamilya na kas ti Abra Petron ken DMJS Tarpaulin Printing Shop.
Nairaman pay a nakasoan dagiti mapapati a kinakinnunsabus na iti nasao a transaksyon a kas kada Municipal Accountant Officer in Charge Henry Bodaño, Municipal Treasurer Officer in Charge Romie Turqueza, Municipal Budget Officer Amelia Bersamira kenni idi ket Zone 5 Barangay Chairman Mila Valera nga asawa ti mayor ken napili a bise mayor ti ili ti Bangued iti kalkalpas a midterm elections.
Malaksid kenni Mila, dagiti nadakamat nga empleyado iti munisipyo ket nabilin a maikkat da iti serbisyo ken agmuwelta da pay.
Ti desisyon ket inyulog ken inapubaran ni Ombudsman Samuel Martires idi October 18, 2018 ken natatakan ni Office of the Ombudsman Security Officer III Michael Gonzales idi June 24 iti agdama a tawen.
