Kinarit ni Caoayan Mayor Germelina “Germie” Goulart dagiti adda iggemna nga ebidensia nga adda mapaspasamak a black sand mining iti ili nga idatagda a mismo kenkuana.
Dayta ket gapu iti agtultuloy a pannaka-babalaw ti maar-aramid a dredging operation iti ili numan pay idi kallabes ket napagnunumuan dagiti maseknan a maituloy daytoy nga addang.
Iti pannaki-uman ti Bombo Radyo Vigan ken ni Goulart, no adda maiparang kenkuana nga ebidensia nga adda black sand mining iti ili ket isuna mismo ti mangidatag ken ni dati nga Ilocos Sur Governor Chavit Singson tapno maited kadakuada ti inkarina nga opisial a P5-M a gungona kadagiti makapaneknek.
Inyunay-unay ni Goulart a kas mayor ti ili ket kalikagumna a salwadan dagiti kailianna, isu nga agtignayda tapno maliklikan ti layus a mapasamak.
