VIGAN CITY – Pormalen a nagsanud nga agpaidasig kas bise gobernador iti Ilocos Sur ni Narvacan Mayor Luis Chavit Singson.
Nasapa a nagturong ti opisina ti Provincial COMELEC Office ni Mayor Chavit kadduana ti kabsatna nga agpaidasig kas gobernador a ni Vice Governor Jeremias Singson ken ti putotna a ni Governor Ryan Singson nga agngayangay kas bise gobernador kenni Mrs. Patch Savellano Singson a nagsanod met ti kandidaturana kas gobernador.
Segun kenni Mayor Luis Chavit Singson, napatpateg kenkuana iti urnos iti pamilya singson ken kasta met iti panaggayyem dagiti agkabsat a da Governor Ryan kenni dati a Congressman Ronald Singson.
Nupay kasta ket saan pay laeng a nagsanud ni incumbent Congressman Deogracias Victor “DV” Savellano iti panagpaidasigna iti isu met laeng a posisyon ngem respetaren ni Mayor Singson ti pangngeddengna.
Saanen nga agpaidasig kas mayor iti ili ti Narvacan ti agdama a mayor ket impasiguradona ti agtultuloy a suportana iti League of Governors, Mayor ken Councilor ta para kenkuana ket isun ti kapintasan nga organisasyon a nakaikappenganna.
Inyunay-unayna pay a saanna a kinalikaguman nga agpaidasig iti kina-senador ta saanna kayat nga adda iti panagdudua ti tattao kenkuana isu a nakasentro latta ti panagtulongna kadagiti umili.
