VIGAN CITY – Inyulogen ti Sangguniang Panlalawigan ti Ilocos Sur Provincial Government ti preventine suspension order ni Mayor Brigido Camarillo Jr. iti ili ti Sta. Maria, Ilocos Sur.
Ti rekomendasyon iti preventive suspension ket gapu iti napigsa nga ebidensya kontra ken ni Mayor Camarillo, kas maibasar iti preliminary evaluation ken panangikonsiderar kadagiti pammabsul dagiti partido.
Innem a pulo nga aldaw ti dumalanan a suspensyon ti mayor ket agtakem nga acting mayor ni Vice Mayor Michael Florendo.
Segun ken ni Florendo, maragsakanda iti nagbalin a desisyon ti gobierno-probinsia adda panawendan a mangtrabaho kadagiti nabaybay-an ti mayor.
Numan pay saan nga umanay ti dua bulan a naited kadakuada a gundaway ket ikagumaanda a leppasen dagiti proyekto wenno programa nga agpaay kadagiti kailianda.
Kapatangnanto met dagiti empleado ken dagiti department head ti munisipio tapno makita no ania dagiti pagtitinnulonganda a proyekto a maipatungpal.
Nagtaud ti pannakasuspenso ti mayor babaen ti naipila a resolusyon iti Sangguniang Panlalawigan gapu iti reklamo a saanna a maak-akman dagiti pagrebbenganna kas mangidaulo iti nasao nga ili.
