VIGAN CITY – Naipasangon iti media ti Canadian national a maitudtudo nga adda kainaiganna iti 1.4 tonelada ti shabu a nakumpiskar dagiti pannakabagi ti linteg idiay Alitagtag, Batangas idi Abril babaen ti panangidaulo ni Department of the Interior and Local Government Sec. Benjamin Abalos Jr.
Nakemmeg ti suspek a Canadian a ni Thomas Gordan, alyas James Martin babaen iti National Capital Region Police Office, Police Regional Office IV A ken Bureau of Immigration idiay Barangay Maitim 2, Tagaytay City idi napan a lawas.
Sumango iti agtutuon a kaso ni Martin pakairamanan ti panaglabsing iti Section 11 ti RA 9165 wenno Comprehensive Dangerous Drugs Act of 2002.
Dinayaw met ni Abalos dagiti pulis nga adda iti likudan ti naballigi nga operasyon kagiddan ti panangipasiguradona a saysayaaten pay ti kapulisan ti kampania kontra iligal a droga iti salinong ti Marcos administration.
