Adda karbenganna nga umawat iti 200 a porsiento iti inaldaw a sueldoda dagiti mangmangged iti pribado a sektor nga agub-ubra iti umuna a walo nga oras inton Mayo 1, Labor Day segun iti Department of Labor and Employment.
Iti salinong ti Labor Advisory No 5 Series of 2025, impaganetget manen ti DOLE a ti Mayo 1 ket regular holiday kas maisurot iti Presidential Proclamation No 727 a pinermaan ni Presidente Ferdinand Marcos Jr.
Para met kadagiti agtrabaho iti nalablabes ngem iti walo nga oras, nayun a 30 percent iti inoras a sueldoda ti nasken a maibayad kadagiti empleado kas overtime pay.
Kabayatanna, dagiti empleado a saan nga agtrabaho inton Mayo 1 ket umawat latta iti buo nga inaldaw a sueldoda, no isuda ket simrek wenno adda bayad iti bakasyon iti aldaw ti trabaho sakbay ti holiday.
Inlawlawag ti DOLE a ti aldaw ti trabaho sakbay ti Mayo uno ket naibatog iti aldaw ti panaginana wenno non-working day, agtalinaed a kwalipikado dagiti mangmangged iti holiday pay no la ket simrekda wenno adda bayad ti leave iti maudi nga aldaw ti trabaho sakbay ti nasao a holiday.
