VIGAN CITY – Ikamang ni Gov. Ryan Singson idiay Philippine National Police main headquarters – Camp Crame iti isyu inaig iti panagraira iti extortion activities dagiti kameng ti Criminal Investigation and Detention Group (CIDG)- Ilocos Sur.
Babaen iti eksklusibo a pannaki-uman ti Bombo Radyo Vigan ken ni Singson, naibaga na a kasoan na iti administratibo ken kriminal dagiti amin nga opisyal ken miyembro ti CIDG- Ilocos Sur gapu ti nasao nga isyu.
Makapungtot iti gobernador gapu ti napasamak idi June 23, nangruna iti panangkemmeg dagiti miyembro ti CIDG kadagiti sangapulo a lallaki nga agop-operate iti mapapati nga online sabong idiay Santa Square Arena, Mabilbila Sur, Santa.
Inbuksilan na nga idi kinemmeg dagiti otoridad dagiti sangapulo a lallaki ket dinawatan da ida ti PHP 200,000 tapnu mawaya-wayaan da laeng ken saan da a makasoan.
Nakadanun kenkuana iti nasao a banag ket insigida a pina-imbestigaran na ket napaneknekan na a saan nga usto iti inaramid dagiti miyembro ti CIDG ta napaneknekan dagiti kinemmeg da a legal ti operasyon da ta inpatulod ida iti kompanya a pinalubusan ti Philippine Amusement and Gaming Corporation (PAGCOR) nga agoperate idiay Santa.
Malaksid kadagiti kaso nga ipila iti gobernador, kayat na a maikkat amin nga opisyal ken personnel ti CIDG- Ilocos Sur, kasta pay nga adda iti maisayangkat a massive revamp wennu panagbalbaliw idiay Ilocos Sur Police Provincial office (ISPPO).
Kangrunaan a kayat pay iti gobernador a pasukatan ket ni ISPPO Provincial Director Adolfo Rafanan gapu ti mapapati a panangbay-bay-a na a mapasamak dagiti iligal nga aramid ditoy probinsiya.
Ti agdama, al-alaen pay laeng ti Bombo Radyo Vigan ti komento wennu reaksyon da Rafanan kenni CIDG- Ilocos Sur Head Police Major Romeo Gajid inaig iti nasao nga isyu.
