Alallukoyen ti Vigan City Social Welfare and Development Office dagiti couple iti siudad a makipaset iti mass wedding a maisayangkat inton November 18, 2024 idiay Vigan Convention Center.
Iti pannaki-uman ti Bombo Radyo Vigan ken ni Gerwin Alarca iti CSWDO, mabalinen nga agrehistro dagiti couple iti Civil Registrar agingga inton October 18, 2024.
Segun ken ni Alarca, agingga ita ket awan pay laeng iti nagpalista isu nga allukoyenna dagiti couple kayatnan iti agkallaysa a mapan agrehistro.
Impasiguradona a saanen a marigatan dagiti couple ta libre nga ipaay iti Vigan City Government iti kandela, belo, biblia, aras, reception ken adda pay sagut a maipaay kadakuada, ngem kukua dagiti couple iti singsing nga aramatenda.
Dagiti requirement iti Civil Registrar ket masapul a taga-Vigan ti maysa kadagiti couple, birth certificate, cenomar para kadagiti agtawen iti duapulo agpangato ken parental consent para kadagiti agtawen iti sangapulo ket walo agingga duapulo.
Kadagiti agkasar a nabalo ket masapul laeng nga ipakitada iti death certificate daydi asawada.
Nu iti biang iti simbaan ket masapul nga agipasa iti birth certificate, titings, cenomar, marriage certificate manipod civil registrar, baptismal certificate, confirmation ken kasapulan nga umatendarda iti seminar.
