VIGAN CITY – Mapalubusan latta dagiti pribado a lugan nga agbiyahe uray nu naiyetnag iti pannakapasardeng ti mass transportation kas kadagiti bus, jeep ken dadduma pay a paglugluganan iti publiko gapu iti pannakaisakup ti intero a Luzon ti enhanced community quarantine.
Dayta iti pinasingkedan ni Cabinet Secretary Karlo Nograles iti naisayangkat a press briefing idi rabii idiay Malacañang.
Segun kenkuana, mapalubusan dagiti pribado a lugan no laketdi mapan da aggatang kadagiti kasapulan da iti tiendaan, supermarket, grocery stores ken convenience store.
Nu pay kasta, inpalagip na a nu enhanced community quarantine ket masapul nga agtalinaed laeng iti uneg iti pagtaengan.
Kabayatanna, pinasingkedan ni Justice Secretary Menardo Guevarra a dagiti aglabsing iti enhanced community quarantine ket makemmeg ken madusa a kas maibasar kadagiti naiyetnag a pagannurutan.
Mabalin a kemmegen dagiti otoridad dagiti aglabsing ket makasuanda iti resistance or disobedience a ti katukad na a dusa ket pannakaibalud agingga ti innem a bulan ken agmulta ti agingga sangagasut a ribo a pisos.
