VIGAN CITY – Naisayangkat ti Mass Training on Cardiopulmonary Resuscitation (CPR) kagiddan iti pannakaisayangkat ti Nationwide CPR Awareness Campaign iti Philippine Heart Association idi July 16, 2022.
Ti nasao nga aktibidad ket addaan ti tema a Moving On, Moving Up: Pushing Harder for a CPR-ready Philippines ket babaen ti panagkakadua ti PHA North Luzon Chapter, Ilocos Sur Medical Society ken Bantay Local Government ket naisayangkat iti training idi Sabado iti oras iti alas otso iti bigat agingga alas dose iti aldaw iti Ilocos Sur Badminton Center iti ili ti Bantay.
Iti pannaki-uman ti Bombo Radyo Vigan ken ni Dr. Leslie Asuncion-Viado manipod Ilocos Sur Medical Society, sakbay pay laeng iti covid-19 ket addan iti isaysayangkatda nga aktibidad kada bulan kadagiti ili tapno isuro iti panag-CPR kadagiti Healthcare worker, Bureau of Fire Protection, Philippine National Police ken Layperson ngem naipasardeng laeng gapu ti pandemia.
Kabayatanna, ikagumaanda nga itultuloy manen ti nasao a kampania tapno ad-adu pay iti masursurwan ngem surotenda latta iti health protocols babaen ti panangisayangkatda Hands-only CPR ken panag-lecture iti 5Cs iti CPR ken Automated External Defibrillator wenno AED awareness.
