VIGAN CITY – Kiddaw ni Bantay Mayor Samuel Parilla iti pannakitinnulong dagiti nakapulapol iti tallopulo ket uppat a covid-19 patient iti nasao nga ili tapno saanen a kumaru pay iti panagwaras iti covid-19.
Iti agdama ket walopulo ket duan a kaso iti covid-19 iti nasao nga ili a maibilangen a local transmission isu a maisayangkat iti mass testing kadagiti amin nga agindeg idiay Zone 3, Bantay pakairamananen dagiti agtawen ti tallo agpangato, Brgy. Official, Brgy. Tanod ken Barangay Health Workers.
Inyunay-unay ti mayor iti panangsurot iti health protocols kas iti pananglimitar dagiti garaw, panangliklik iti mass gathering ken saan a napateg a panagbiahe, panangsurot iti social distancing ken panangpatalinaed a nasalun-at ken proper hygiene tapno masalakniban ti bagi ken pamilia kontra iti covid-19.
Immunan nga imparuar ni Governor Ryan Luis Singson iti Executive Order No. 33 a mangidalan iti Modified Enhanced Community Quarantine iti ili ti Bantay manipod inton bigat April 27, 2021 agingga May 10, 2021.
