VIGAN CITY – Duapulo ket uppat ti ubbing manipud iti tallopulo ket uppat a napapatay iti mass shooting iti maysa a pagadalan idiay Thailand.
Iti pannaki-uman ti Bombo Radyo Vigan ken ni Bombo International News Correspondent Kayezelle Sesuca-Vite, agtawen laeng iti dua agingga tallo dagiti biktima nga ubbing idinto nga adda pay dagiti nairaman a nataengan ngem saanen a nadakamat no isuda ket nagannak wenno mangisursuro.
Ti suspek ket dati a Senior Police Officer Panya Kamrab nga adda kasona panggep ti droga idi napan a tawen.
Naggapu iti korte ti suspek sakbay nga inaramidna ti krimen ta adda hearing inaig iti kaso a nakainaiganna.
Innayon ni Sesuca-Vite a nagtultuloy latta ti panangpalpaltogna uray nakalugan isunan ket kalpasanna, pinatayna pay ti asawa ken ti putotna sakbay a nagpakamatay babaen ti panangpaltogna iti bagina.
Inladawanna a saan nga uso ti adu nga agbambantay a gwardya wenno pulis iti lugar ta manmano laeng nga adda pasamak a kas ti mass shooting idiay Thailand isu a mabalin nga impagarup laeng ti dadduma a maysa a nagannak ti suspek idi simrek iti pagadalan.
