VIGAN CITY- Maisayangkat inton umay a bulan ti mass immunization ti Department of Health- Region 1 iti intero a rehiyon kontra ti kamuras tapnu maliklikan nga umadu pay iti bilang dagiti naapektaran iti nasao a sakit.
Segun ken ni Dr. Valeriano Jesus Lopez, Regional Director ti Center for Health and Development ti DOH-Region 1, idi laeng napalabas a bulan ket dua gasut ket lima pulo a porsyento iti ngimmatoan nan iti bilang dagiti nagkamuras ditoy Region 1 nu ikomperar iti isu met laeng a bulan idi napalabas a tawen.
Idi January 2018 ket uppat a pulo laeng ti bilang dagiti nagkamuras ngem idi napalabas a bulan, umaboten iti sangagasut ket lima ti bilang dagiti nagkamuras a pasyente ditoy Region 1, ket lima iti natayen nga agpapada a taga-Pangasinan.
Segun ken ni Lopez, ninamnama dan a ngumato ti bilang dagiti agkamuras itatta a tawen ta nababa ti immunization rate wennu panagtalek dagiti tattao ti vaccination program ti gobiyerno nga immabot laeng iti lima pulo agingga innem a pulo a porsyento gapu ti dengvaxia.
