Pagan-annaden ti Maritime Industry Authority dagiti barko a rehistrado iti pagilian ken dagiti tripulante a Pilipino gapu iti kumarkaro a riribuk iti Middle East.
Binilin ti MARINA dagiti amin a Philippine-registered ship nga agbibiahe iti international routes, agraman dagiti ship owner, shipping company, operator, manager, manning agency ken dadduma pay a maritime enterprise a mangipatungpal iti precautionary measure.
Karaman kadagiti naibilin nga addang ti panangpapigsa iti seguridad, nainget a monitoring iti sitwasion, nainget a panangsurot iti traffic separation scheme, ken panangpatalinaed a silulukat ti linya ti komunikasion kadagiti maseknan.
Nabilin pay dagiti barko a mangisayangkat iti regular reporting iti lokasion ken destinasionda, dagus nga ireport ti ania man a makapaatap nga insidente, ken siguradwen ti kinatalged ken pagsayaatan dagiti tripulante iti ania man nga oras.
