VIGAN CITY – Agtultuloy iti pannakasapul kadagiti mapukpukaw nga indibidual idiay Japan kalpasan iti napasamak a magnitude 7.6 a ginggined idi baro a tawen a nakatayanen iti nasurok duagasut a tattao.
Iti pannaki-uman ti Bombo Radyo Vigan ken ni Bombo International News Correpondent Haydee Fieldad nga adda idiay Kahuhu Shi, Japan, maladingitan iti agdama a sitwasyon idiay Japan ta adu iti pimmusay gapu ti ginggined ngem yamanenna ta ararmiden amin a kabaelan ti gobierno iti Japan tapno matulongan amin a naapektaran.
Segun ken ni Fieldad, adda dagiti sumangsangpet a relief goods para kadakuada babaen kadagiti naka-helicopter ta isu laengen ti kadarasan a transportasyon a maaramat tapno maidanon dagiti kasapulanda kalpasan a saan a madalanan dagiti kangrunaan a kalsada gapu iti pannakabettak wenno naggrenggatna nga epekto ti ginggined.
Parikotda pay laeng met iti kaawan ti danum ken kuryente ta arigna natumba amin a poste idi napasamak iti didigra.
Ngem nu pay kasta, pagyamananna iti impaay a tulong ti Philippine Embassy ken Philippine Consulate ta dinanonda pay dagiti luglugar a nakaru a naapektaran tapno mamonitor iti kasasaad dagiti Pilipino iti nasao a pagilian ken maited iti kasapulan a tulong a rumbeng kadakuada.
VIDEO BINC HAYDEE FIELDAD
