VIGAN CITY – Manamnama ti pannakaisublinto met laeng ti narecover a Toyota Hiace a lugan idiay Barangay Maynganay Sur, Sta. iti akinkukua a ni Engelbert Ramos Cardenas, agtawen iti limapulo ket dua, taga-Barangay Ag-agrao, iti nasao nga ili.
Iti pannaki-uman ti Bombo Radyo Vigan ken Police Captain Joel Dasargo, mai-turn overto pay nga umuna ti lugan iti Highway Patrol Group ta masapul ket maikkat pay ti flash alarm iti nasao a lugan gapu ti pannakapukawna iti kallabes sakbay a maisubli iti akinkukua.
Natakuatan a ti lugan ket insalda idi ti akinkukua iti gatad a PHP170K ken ni Ryan Joseph Lagman ngem kalpasan ti mano laeng nga aldaw ket sakaenna koman ngem awan ti maiparang a lugan ti nagisaldaanda gapu ta inlakonan iti sabali.
Namitlo payen a nayallatiw ti nasao a lugan agingga a natunton iti agdama nga akinkukua a daytoy ket nakasoan met laeng iti Anti-Fencing Law.
Kinuna ti naudi a nagtagikua ti lugan a nagtaltalekda idi iti mailako kadakuada gapu ta miembro iti pulis idiay Baguio ti nagilako.
Iti agdama, saan pay a natiliw ni Lagman a sumangsango iti kaso a Republic Act 10883 wenno Carnapping.
