VIGAN CITY – Mapatta-patta a walopulo a ribo a pisos ti gatad dagiti alikamen a natakaw manipud iti tallo a kwarto iti maysa a hotel idiay Monte Leah Beach Resort, Barangay Sulvec, Narvacan.
Dagiti biktima manipud iti Room 1 ket da Honey Mae Coloma, agtawen iti duapulo ket pito ken ni Anthony Heruela, agtawen iti tallopulo ket siam.
Manipud met iti Room 3 ket biktima da Jocelyn Saloria, agtawen iti limapulo ket uppat ken ni Kristina Sambrana, agtawen iti duapulo ket pito.
Kabayatanna, manipud iti Room 5 ket da Archie Dela Cruz, agtawen iti uppat a pulo ket tallo ken ni Jeselle Dela Cruz, agtawen iti uppat a pulo ket dua nga agpapada a taga-Barangay Tabtabungao, Rosario, La Union.
Alas dos bente y singko iti agsapa ti December 4 idi nariing ni Archie Dela Cruz idi nakangngeg iti sabsabali nga uni manipud iti sliding door iti kuartoda.
Manipud iti dayta, bimmangon a dagus ket nakitana a nalukatan ti ridaw isu a nagpukkaw iti “tao!” ket isu met ti gundaway a limmagto iti veranda ken nagpalaud a direksyon.
