VIGAN CITY- Inlawlawag ni Bombo International News Correspondent Denmark Suede, maysa a piloto, no ania iti kayat na sawen iti Turbulence kalpasan iti napasamak nga insidente ti Singapore Airlines a nakatayan ti maysa a pasahero ken nakadunoran ti pitopulo ket maysa a tao.
Iti pannaki-uman ti Bombo Radyo Vigan kenkuana, mapaspasamak ti Turbulence no agsukat iti atmospheric pressure gapo ti nadumaduma a pressure ti law-ang.
Mabalin a makaited ti air traffic control iti warning kadagiti Piloto no adda turbulence iti area ngem no dadduma ket saanda a makita.
Segun kenni Suede, napadasannan iti naglugan ti Singapore Airlines, isunga posible nga idi napasamak ti aksidente ket saan a naka-seatbelt ken nakariing dagiti pasahero ta isu iti panangi-serve ti breakfast ken panagusar iti comfort room.
Kaaduan a pasahero ti nasao nga eroplano ket naggapo iti Australia ta awan iti Direct flight isu a kasapulanda iti bumaba idiay Singapore.
Kabayatanna, inyunay-unay ni Suede a natalged latta iti aglugan ti Eroplano, ta basar iti record ti US Federal Aviation Administration, manipud iti uppat a billion a pasahero iti agbiabiahe iti kada tawen, tallopulo a pasahero laeng manipud 2019-2021 iti na-injured no iyarig kadagiti bilang dagiti maak-aksidente iti motorsiklo .
Binalakadanna dagiti pasahero a nasken nga ag-seatbelt ken sumurot kadagiti instruction no aglugan iti eroplano. //Bombo Mary Grace Beltran
