VIGAN CITY – Awan pay laeng iti agipangato ti presyo ti live weight ken karne ti baboy, dayta iti inbaga ni Vice Governor Jerry Singson iti sangwanan dagiti kameng iti media idi nalpas ti taripnong ti provincial government kadagiti hog raisers ditoy probinsiya.
Segun ken ni Singson, saan a mabalin nga adda agipangato iti presyo kadagiti liveweight ken karne ti baboy ta agsobsobra pay iti suplay ditoy probinsiya nga isu ti maysa kadagiti pakaragsakan da.
Inlawlawag na pay a ti maysa a kilo ti bagnet ditoy Vigan City ket PHP 450 pay laeng iti presyo na ket idiay laeng Sto. Domingo ti lima gasut a pisos iti panaglako da ta isu ti kiniddaw dagiti agar-aramid ken aglaklako ti bagnet.
Agsipud ta sapsapado pay laeng iti suplay ti baboy ditoy probinsiya, maiparit pay laeng a maiserrek dagiti live hogs ken frozen meat nga aggapu iti sabali a lugar iti laksid nga inbilin ni Agriculture Secretary William Dar idi bimmisita ditoy probinsiya a mabalin a maiserrek dagitoy nu la ketdi adda ti naan-anay a dokumento da nga aggapu ti Bureau of Animal Industry ken National Meat Inspection Service.
