VIGAN CITY – Agtultuloy ti imbestigasyon dagiti pannakabagi ti linteg iti napasamak a panagtakawan idiay Brgy. Bigbiga, Santiago, Ilocos Sur.
Dagiti biktima ket da Nikki Garlejo Balantac, agtawen ti duapulo ket siam ken ni Erica Caballero Sierda, agtawen ti duapulo ket uppat nga agpada nga agnaed iti nasao a lugar.
Segun ti Santiago Municipal Police Station, nakaawatda ti report inaig ti panagtakawan iti pagtaengan dagiti biktima isu a nagrespondeda.
Maibasar ti pakpaka-una nga imbestigasyon, nakariing dagiti aglive-in partner a biktima idi naamwanda a mapukpukawen ti cellphone ni Nikki idinto nga awan pay ti bag ni Erica a naglaon ti duaribo lima gasut a pisos, debit card ken ID’S.
Mapapati a nagna dagiti suspek iti daya a paset ti tawa iti kuarto dagiti biktima ta napanawan a nakalukat.
Nupay kasta idi parbangon ti October 17, 2021 ket rimuar ti ama ni Nikki a ni Eduardo Balantac a napan immisbo ket adda ti dua a lalaki a nakitana a timmaray iti laud a direksyon ti pagtaenganda.
Kabayatanna, mapapati pay a natakawan ti maysa nga online seller a ni Shielo Cabalo Vergara, agtawen ti uppat a pulo ket dua, naasawaan nga agnaed idiay Brgy. San Rafael, San Esteban.
Maibasar ti inisyal nga imbestigasyon ti pannakabagi ti linteg, immuli ti saan pay a nabigbig a suspek iti terrace iti laud a paset iti nasao a pagtaengan isu a nariing ti anak ti biktima gapu ti ariwawa ngem napaturogan ti paltog.
Naala ti suspek ti maysa a unit ti cellphone nga aggatad ti limapulo a ribo a pisos, maysa pay a cellphone nga aggatad ti sangapulo ket lima ribo a pisos ken nasurok kumurang uppat a gasut a pisos a kuarta.
Ti suspek ket nabigbig a maysa a lalaki a nagaramat ti multicolored bonnet, mapatta-patta a 5’5” iti katayagna ken addaan a nabigbig a Calibre iti paltog.
