VIGAN CITY – Natay gapu iti mapapati a pannakakimatna ti maysa a mannalon idiay Sitio Kimpakpakan, Barangay Sto. Rosario, Sigay, Ilocos Sur.
Nabigbig ti biktima a ni Rogelio Ambog Sucop, agtawen iti innem a pulo ket lima, agnaed iti nasao a lugar.
Inreport ti bise mayor ti ili iti Sigay Police Station nga adda bangkay a nakitada iti lugar a dagus met a tinurong dagiti pannakabagi ti linteg kaduada dagiti kameng ti Rural Health Unit ken Municipal Disaster Risk Reduction and Management Office.
Idi masangpetanda ti lugar, nayawiden dagiti kabagyanna ti biktima isu a tinurong dagiti maseknan a nagresponde iti pagtaengan.
Idi mainspeksyon ti bagi ti biktima, adda dunor iti akin-kannawan a tengnged ken burned/lacerated wounds iti agsinnumbangir a tumengna.
Segun ken ni Dominador Balingtan Ambog, nakitada ti biktima iti alas sais y media iti bigat a nakadasay iti kubona ken mapapati a nakimat.
