VIGAN CITY – Inbalakad ni Provincial Agriculturist Oscar Tobia kadagiti mannalon ditoy probinsiya nga isanud da pay laeng iti agmula kadagiti naduma-duma a produkto a kas ti mais, pagay ken nateng gapu ti dua a bagyo a simrek iti Philippine Area of Responsibility tapnu saan a madadael dagiti produkto da.
Nadakamat na a masapul iti panagsagsagana ken panangkita a naimbag kadagiti naimulan a produkto tapnu awan iti masayang a bannug dagiti mannalon kasta payen dagiti mula da.
Kabayatanna, kimmapsot ti Bagyo Ramon idi naglandfall idiay Santa Ana, Cagayan idi alas dose baente ti tingnga iti rabii.
Maibasar ti 5 am severe weather bulletin ti PAGASA, maysa laengen a Severe Tropical Storm iti bagyo ngem naudi a nasaripatpatan idiay Baggao, Cagayan a ti kapigsa iti angin na ket sangagasut a kilometro agingga a pumigsa ti sangagasut innem a pulo ket lima a kilometro kada oras.
Agpapa-abagatan a laud iti bagyo iti kabuntog a sangapulo a kilometro tunggal oras.
Agsipud ta kimmapsoten iti bagyo, awanen ti lugar a nakaibayog iti Tropical Cyclone Warning Signal Number 3 ta signal number 2 laengen iti nakaibayog ditoy probinsiya, pakairamanan idiay Batanes, Cagayan pakairamanan ti Babuyan Islands, Apayao, Kalinga, Abra ken Ilocos Norte idinto a Signal Number 1 idiay akin-amyanan a paset ti Isabela kas kadagiti ili ti Sta. Maria, San Pablo, Maconacon, Cabagan, Sto. Tomas, Quezon, Delfin Albano, Tumauini, Divilacan, Quirino, Roxas, Mallig, San Manuel, Burgos, Gamu at Ilagan City; Mountain Province, Benguet, Ifugao, La Union ken Pangasinan.
Kabayatanna, ti met bagyo Sara ket naudi a nasaripatpatan iti kaadayo a lima gasut ket sangapulo a kilometro daya- amyanan a daya ti Virac, Catanduanes wennu pito gasut ket lima pulo a kilometro, daya ti Infanta, Quezon.
Agpapa-amyanan a laud ni Bagyo Sarah iti kabuntog a dua pulo ket lima a kilometro tunggal oras a ti kapigsa iti angin na ket lima pulo ket lima a kilometro tunggal oras agingga a pumigsa ti pito pulo a kilometro tunggal oras.
