Maysa a mannalon ti biktima iti pammaltog iti natayan idiay Sitio Multawi, Pacac, Dolores, Abra.
Nabigbig ti biktima a ni Dave Guzman Millare, agtawen iti tallopulo ket uppat, taga-Barangay Lingtan, Bangued.
Ti suspek ket ni Alex Ola, agtawen iti uppat a pulo ket innem, taga-Sitio Kalading, Pacac, Dolores.
Iti pannaki-uman ti Bombo Radyo Vigan ken ni PLTCOL. Daniel Pel-ey iti Abra Police Provincial Office, agin-inom ti biktima ken suspek iti natayan idin ta rimsua ti saanda a pagkinnaawatan agingga a nagginnubalda.
Inasot ti suspek ti paltogna sa pinaltuganna ti biktima iti namitlo a daras a nakasagrapanna iti tama ti paltog iti kannigid a takyagna, kannawan a temporal, kannigid a paset tyan ken kannawan a durina ngem adda itan iti natalged a kasasaad.
Naglibas ti suspek kalpasan ti pammaltog isu a naiwayat ti dragnet operations ngem kalpasanna ket simmuko met laeng daytoy kadua ti asawana.
Narekobre iti nakapasamakan ti pammaltog ti dua a basyo ti caliber 45 ngem ti paltog ket imbelleng ti suspek iti kataltalunan nga isu ti sapsapulen ita dagiti pannakabagi ti linteg.
Homicide ken panaglabsing iti Omnibus Election Code ti maisagsagana a kaso a sangwen ti suspek.
Inlawlawag met ni Pel-ey a daytoy a pasamak ket awan pakainaiganna iti mapaspasungadan nga eleksion.
