Agtultuloy a masapsapul ti maysa a mannalon a mapapati a nalmes idiay Barangay Panay Norte, Magsingal, Ilocos Sur.
Nabigbig ti mannalon a ni Virgilio Madriaga Pamo, agtawen iti limapulo, agnaed iti nasao a lugar.
Nakaawat ti Magsingal Police Station iti report manipud iti maysa a concerned citizen a nangipakaammo nga adda nalmes iti irigasyon iti nasao a lugar.
Dagus a nagresponde dagiti kameng ti Magsingal Police Station, kaduada ti Bureau of Fire Protection, Provincial ken Municipal Disaster Risk Reduction and Management Office, ken dagiti barangay official ket nadanunanda a mapukpukaw pay laeng ti biktima.
Segun iti asawa ti biktima a ni Vanessa Pamo, bayat ti pannagnada iti rangtay, nakakita ti biktima iti kawayan a tumtumpaw iti kanal, ken tinapogna daytoy a mapan ikkaten.
Gapu ti kapegges ti danum, nayanud ken mapapati a nalmes agsipud ta agingga ita ket saan pay laeng a nasarakan.
Pinadas pay ti kayongna a ni Arman Torquato nga isalakan ti biktima ngem saan a nagballigi.
