VIGAN CITY – Dunor iti tengnged ken agsinnumbangir a saka ti sinagaba ti maysa a mannalon a natay ta nakimat idiay Sitio Kimpakpakan, Barangay Sto. Rosario, Sigay, Ilocos Sur.
Ti biktima ket ni Rogelio Ambog Sucop, agtawen iti innem a pulo ket lima, agnaed iti nasao a lugar.
Iti pannaki-uman ti Bombo Radyo Vigan ken ni PCapt. Medward Galay a hepe ti Sigay Municipal Police Station, impakaammo kadakuada ni Sigay Vice Mayor Dionisio Lang-ay Jr. inaig ti pannakasarak ti bangkay isu a tinurongda ngem naabotda iti dua nga oras sakbay a nakadanon iti lugar gapu ti kinasulinekna.
Segun ken ni Galay, naipanen ti biktima iti pagtaenganda idi nakadanonda iti lugar isu a nakitada ti dunorna a mapapati a nagruaran ti kuryente idi nakimat.
Maipalagip a kinakuyog pay laeng ti biktima ti uliteg ken ikitna idi June 9 iti alas tres iti malem ta nagmulada ti kamutit ngem gapu ti kapisa a tudo ken kimat ket nagawidda ngem saanda a naggigiddan ta immuna ti biktima isu a nakigtotda ta idi bigat iti June 10 ket saanda a nakita ti biktima.
Sinapulda ti biktima agingga nakitada a nakapakleb nga awanen ti biagna iti sangwanan ti maysa a kubo iti nasao met la a lugar ket nagsagaba ti dunor a mapapati a nakimat.
VIDEO – PCAPT. MEDWARD GALAY
