Pinasingkedan ni Vigan City Agriculturist Lito Forneas a dagiti laeng mannalon a nakasaganan nga agibunubon iti mawarasan iti bin-i ti irik.
Iti pannaki-uman ti Bombo Radyo Vigan ken ni Forneas, ti addang ket tapno maliklikan ti pannakasayang ti irik ken ti kuarta ti gobierno no adda dagiti umay agala a saanda a maibunubon.
Tapno masiguradoda a saan a masayang ket saludsodenda nga umuna dagiti mannalon no ania nga aldaw ti panagibunubonda sa da imonitor.
Maikkan iti maysa lawas a pawayway dagiti mannalon tapno maibunubon ti maawatda, ngem no saanda a makasurot ket saandanton a maikkan kadagiti dadduma pay nga interventions kas ti abono ken soil conditioner.
Dagiti met nakasurot iti pammilin ket agreportda iti opisina ken mamonitorda met laeng sakbay a maikkanda manen kadagiti nasao a farm intervention.
Ti pannakaibunong dagiti irik kadagiti mannalon ket naituding iti kada Lunes ken Mierkoles iti linawas.
