VIGAN CITY – Dead on Arrival ti maysa a lalaki a nagmaneho ti motorsiklo idinto a nakalasat ti drayber ti van a nakadinnungparna iti national highway idiay Brgy. San Nicolas, San Esteban, Ilocos Sur.
Nabigbig ti natay a ni Albert Tubon, drayber ti maris dapo a Yamaha Gravis, naasawaan, mannalon, a taga-Brgy. Napo, Sto. Domingo idinto a ti drayber ti Canter Aluminum van ket ni Jonathan Merano Gutierez, agtawen ti 40, maysa a truck driver a taga-Brgy. Bancagan, Naguilian, LA Union.
Segun kenni PLt. Arnold Calzado iti San Esteban Municipal Police Station, ti drayber a natay ket mapan koma agpasyar iti Skyline idi napasamak iti insidente.
Agpapaabagatan a direksyon ti nakamotor idin nagsikko ket nakadinnungparna ti agpapa-amianan a direksyon a van.
Head injury ken natukkol ti saka ni Tubon isu nga insigida iti Candon General Hospital ngem indeklarar a dead on arrival.
Iti agdama, iggemen dagiti otoridad ti motor ken van karaman ti driver-na a ni Gutierez para iti naan-anay nga imbestigasyon.
