Paimbestigaran ni Bicol Saro Partylist Rep. Terry Ridon iti House Committee on Public Accounts ti Manila Bay Dolomite Beach project a napondoan ti P389 million.
Ti addang ket kasaruno tipanangibaga ti Metro Manila Development Authority wenno MMDA a karaman dayta kadagiti rason ti panaglayos iti agduduma a paset iti Manila.
Iti naipila a House Resolution 56, kinuna ni Ridon nga imbaga ti MMDA a nakabara iti Manila Bay Dolomite Beach Project iti tallo a kangrunaan a drainage idiay Faura, Remedios ken Estero de San Antonio Abad idiay Manila.
Gapu ti Dolomite Beach ket agturong ti layos iti maysa a sewerage treatment plant a saan a makabael iti dakkel a volume iti danum ti tudo.
Inlawlawagna a ti Manila Bay Dolomite Beach project ket saan a paset a talaga ti Manila Bay Rehabilitation Master Plan nga inaprubaran iti dati a National Economic Development Authority wenno NEDA.
Innayonna nga awan ti tulong ti dolomite beach iti panangsalaknib iti Manila Bay coastal resources wenno manglapped iti layos, erosion ken polusyon.
