Nagpanawagan ti transport group a Manibela iti Department of Energy a bantayanda ti presio ti produkto-petrolyo kadagiti oil company gapu ta adu dagiti managgundaway.
Iti pannaki-uman ti Bombo Radyo Vigan ken ni Chairman Mar Valbuena, kidkiddawenda iti Senado ken Kongreso a maipaayanen iti turay ni Presidente Ferdinand Marcos Jr. nga ipasardeng ti excise tax ta dakkel a pakabang-aranda ti maikissay a P6 iti kada litro ti krudo ken P10 iti gasolina no bilang maisardeng ti nasao a buwis.
Malaksid ti pannakaikkat ti excise tax, kidkiddawenda pay iti P1 a provisional fare increase iti Land Transportation Franchising and Regulatory Board tapno adda met laeng masapulan ti transport sector, kagiddan ti panangkiddawda iti panagawat ti publiko no ngumina ti plete ta no saan a maingato ket posible nga awanen ti agpasada.
Kabayatanna, impanawaganna pay kadagiti maseknan nga ahensia a mapadaras ti pannakaipaay ti fuel subsidy ken maurnos ti listaan dagiti operator nga umawat.
P8,000 kada drayber ti isingsingasing ni Valbuena a maited a subsidiya ngem depende pay no kasano kapaot ti riribuk a mapaspasaran iti Middle East ken no kasano kangina ti presio ti produkto petrolyo.
