Naituding a mangisayangkat ti transport group a MANIBELA iti tallo aldaw a nationwide transport strike manipud Setyembre 28 agingga 30 kas protesta iti agtultuloy a panagpangina ti presio ti produkto petrolyo.
Segun ken ni MANIBELA chairman Mar Valbuena, dakkel a paset ti pastrek dagiti drayber ken operator ti mapmapan iti nangina a presio ti krudo isu a panawaganda ti nasapsapa a tignay manipud iti gobierno.
Karaman kadagiti kiddawda ti pannakailaklaka ti presio ti krudo, nayon a plete para kadagiti drayber ken operator, ken panangikkat iti excise tax ken value-added tax kadagiti produkto petrolyo.
Kabayatanna, mangisayangkat pay ti PISTON iti agsina a nationwide transport strike inton Setyembre 29 ken 30 gapu iti nangina a presio ti langis, a mabalin a mangapektar iti dadduma a ruta ti pampubliko a transportasyon.
