VIGAN CITY – Dead on arrival gapu iti pannakalmesna ti maysa a mangngalap idiay Barangay Dadalaquiten Norte, Sinait, Ilocos Sur.
Nabigbig ti biktima a ni Edison Ancheta Yagin, agtawen iti limapulo ket innem, agnaed iti nasao a lugar.
Nakaawat ti Sinait Police Station iti tawag manipud iti concern citizen a mangipakpakaammo nga adda nalmes idiay Barangay Dadalaquiten Norte ket dagusda met a tinurong.
Segun iti maysa a menor de edad a nakaimatang, nagpatulong ti biktima kadakuada a mangala iti sigayna na iti nakapasamakan ti insidente.
Idi nakadanunda iti ayan ti sigay, timmapog ti biktima manipud iti rakitna ket kalpasan ti mano a minutos, nasdaaw dagiti witness ta saanen a limmung-aw pay ti biktima, isu nga impagarupda nga amangan ta nalmes ket dagus a nagpaarayatda.
Na-CPR ti biktima ken naipan iti Corpuz Clinic and Hospital-Sinait ngem saanen a naispal pay ti biagna.
