Naalaw ti maysa a mangngalap a nastranded iti kabaybayan ti Brgy. Alangan, Magsingal, Ilocos Sur.
Ti mangngalap ket ni Ceferino Rilator Molato, agtawen iti inem a pulo ket lima, naasawaan, mangngalap, taga-Brgy. Germinal, Bolinao, Pangasinan.
Napan ni Molato ken dagiti kakaduana nga agkalap ti ikan idiay Bolinao, Pangasinan ket naibusan ti gasolina iti motorbanca-da ken saanna a masapulan dagiti kakaduanan.
Alas-otso iti bigat, napan nagkalap ni Carlito Pagud Pagay idiay Brgy. Alangan, Magsingal iti kaadayo nga 35 nautical miles laud iti ili San Esteban, ket nakitana nga adda ti bangka isu a napanna inasikgan ket nakitana ni Molato.
Dagus met nga inluganna iti motorbancana ti naalawna a mangngalap ken napanda iti igid ti kabaybayan.
Gapu iti napasamak ket nakikammayetda iti Bolinao Municipal Disaster Risk Reduction Management Office ken impakaammodan iti pamilya ti mangngalap ti napasamak.
Insigida a naipan iti balay pagagasan ti mangngalap para iti naan-anay a pannakamonitor ti salun-atna.
