VIGAN CITY – Sapsapulen ita dagiti pannakabagi ti linteg ti mapukpukaw a mangngalap a ni Romnick Pagay Piano nga agtawen ti tallo pulo ket maysa nga agnaed idiay Puro, Magsingal ta napan nagkalap idi alas tres iti parbangon idi November 27 ngem saanen a napasangpet dagiti kameng ti pamilya na.
Nadakamat ni Police Captain Mark Lagman, hepe ti Magsingal municipal police station a kas maibasar iti istorya ti kabsat ti biktima, agawid da kuman idi nagpalya ti motor iti nagluganan na a bangka ngem inbaga ti biktima kadagiti kakadua na nga umun-una da lattan nga agawid ta simpaen na pay iti motor ti bangka a nagluganan na ngem saanen a nakaawid.
Naipaka-ammon kadagiti kabangibang a lugar ti Magsingal iti nasao a pasamak tapnu maipakaammo kadagiti pannakabagi ti linteg nu nakitkita da ti biktima.
Ti biktima a mapukpukaw ket nakabado ti nangisit, naka-jacket ti berde ken naka-jogging pants.
