VIGAN CITY – Natalgeden ti kasasaad ti mangngalap a ni Richard Tucson, agtawen iti uppat a pulo ket innem a taga-Barangay Nangalisan, Santa Lucia kalpasan ti pannakaalawna idiay Barangay Alangan, Magsingal.
Iti pannaki-uman ti Bombo Radyo Vigan ken ni Police Corporal Emmanuel Reolalas, alas syete y media iti December 27, agkalkalap iti karayan da Jojo Pagay, agtawen iti tallopulo ket tallo ken ni Ronald Renon, agtawen iti tallopulo ket siam, agpada a taga-Barangay Alangan idin ta nakitada ni Tucson a nakalugan iti timmaob a bangkana nga agpapaarayat ket dagus met nga inalawda.
Segun met ken ni Tucson, alas singko iti malem idi December 26 idi napan iti kabaybayan ta uray naangin ti tiempo ket pinadasna latta ti nakigasang-gasat.
Nupay kasta, saan a naan-ano ti naalaw a mangngalap nga ita ket nayawiden iti pagtaenganda.
Imbalakad met ni Reolalas kadagiti mangngalap a no ammodan a nadawel ti baybay ket saandan nga agtuloy a mapan tapno saanda a maisagmak.
