VIGAN CITY – Agtultuloy ti panangkita dagiti pannakabagi ti linteg iti San Vicente Police Station kadagiti CCTV iti lugar para iti panangduktalda iti pakabigbigan dagiti suspek a nangpaltog ken ni Antonio Lucero, agtawen iti innem a pulo ket dua, mangngalap a taga-Barangay San Sebastian, San Vicente.
Iti pannaki-uman ti Bombo Radyo Vigan ken ni Police Major Darwin Julian, awan met ti nakarir-riri ti biktima iti kallabes ta daytoy ket mabigbigbig a mannakigayyem.
Maipalagip a ti biktima ken ti kaduana keta gin-inom iti pagtaenganda idin ta dimteng dagiti suspek a nakalugan iti NMAX a motorsiklo, nakahelmet iti nalabaga ken nakamangisit a jacket a nangpaltog iti biktima iti namitlo a daras.
Naitaray ti biktima iti balay pagagasan ngem saanen a nakalasat.
Kabayatanna, tallo a basyo ken maysa a slug iti mapapati a caliber 45 a paltog ti naalada manipud iti nakapasamakan ti krimen.
Iti agdama, im-imbestigaran dagiti pannakabagi ti linteg no ania ti motibo iti pammaltog.
Imbilin met ni Ilocos Sur Police Provincial Office Acting Provincial Director Police Colonel Darnel Dulnuan ti San Vicente Police Station nga usarenda amin a kabaelanda tapno masulbar ti kaso.
Kiddawna ti tulong ti publiko nangruna kadagiti nakakita iti pasamak nga ipakaammo kadakuada no adda impormasyon nga ammoda tapno naal-alisto ti imbestigasyon.
