Nakemmeg babaen iti hot pursuit operation ti maysa a mangngalap gapu iti panangbagkongna iti maysa a construction worker idiay Barangay Danuman West, Sta. Maria, Ilocos Sur.
Nabigbig ti suspek a ni Arnold Llanes Dela Rosa, agtawen iti uppat a pulo ket innem, taga-Barangay Bia-o, Sta. Maria.
Ti met biktima ket ni Jomedes Diego Molina, agtawen iti tallopulo ket pito, taga-Barangay Danuman West iti nasao nga ili.
Naitarayen iti ospital ti biktima idi makasangpet dagiti agresponde a pannakabagi ti linteg.
Maibasar iti imbestigasyon, nagriri ti suspek ken ti maysa a managan iti Efren Cabuag ket idi nagdinnanogda, bimmallaet ti biktima a nanganawa kadakuada.
Gapu dayta, nakapungtot ti suspek iti biktima ket inasotna ti armasna a pinangbagkong iti biktima a nagsagabaanna iti dua nga stab wounds kangrunaan iti akin-kannigid a paset ti tyanna ken akin-kannigid a sikona.
Ti folding knife wenno balisong nga agrukod iti 21 cm karaman apputanna ket narekobre sangapulo ket lima a metro amianan a daya manipud iti nakapasamakan ti krimen.
Adda metten iti natalged a kasasaad ti biktima.
